Dileto Dialeto

di Nidia Robba
ed. La Mongolfiera libri, pagg.115, luglio 2011

(Note dell'Autrice) - Cossa dovessi dir de mi? Mi, de mi? No xe la prima volta che trato l'argomento del mio libro che presento. Anzi devo dir che me diverti, perchè no zerco critiche o consensi, nè lodi nè scriti rafinadi. Po' no xe questa la prima volta che scrivo in dialeto. L'aprocio lo go avù con "Trieste La Linda": el primo libro che xe stà publicado. El iera mezo in Dialeto e mezo Idioma; me lo presentava un critico che se iera interessado. Ma questa volta el xe tuto in Dialeto meno la dedica, pel gran rispeto che gavevo e go per i "Amici del Dialeto". No iera el caso di cominciar a sbagliar proprio parlando de lori! Anzi me ne scuso subito, con una poesia iniziale, perchè el mio dialeto no xe studià. Xe quel che parlo: forsi ingentilido al confronto de quel de ani fà.

Dopo considero la stufagine de quei invitai ala presentazion (e xe zà 18 libri). Però devo dir che un'amica se ga rabià, perchè al 16 luglio del ano passà, no la go invitata, pensandola in Sicilia, come sempre in 'sto mese e po' beata l'ora perchè cussì no ocoreva che la trovassi scuse per no vinir. Come disi le divisioni, parlo prima de tuto dela mia Trieste: con tanto amor, tenereza e paura. Sì perchè la xe, come mi, sfortunada. El suo futuro me preocupa assai: 'sta zità ne ga passade trope!

Pensè ben! Che altre zità gavù tanti paroni? Quei che la ga spetà per tanto tempo la ga tratada con indiferenza; ma go paura che sarà ancora pezo. Mi pianzo i morti, perchè li amo tanto. Come amo la Tera, la Natura, el mondo animale... ma purtropo no amo i predatori: nè bestie nè omini, nè tuti i più grandi che sempre ga magna i poveri più pici. Mi son lontana da tute le grandeze. Le mie Ultime Volontà lo disi ciaro. Go sempre voia de disprezar e rider de chi vol essere sempre el primo... anche nelo Sport!

La dona me fazeva compassion; ma adesso vedo che la ga esagerado e lù ga propio qualche bona ragion. Son fissada con le regole metriche anche se 'endecasillabo spesso tradissi. Le regole devi esister in tuto! Se no, no ghe xe educazion! Finisso questa storia con l'"Ano Astrale", tenendome fissa quei veci equinozi e solstizi. No me disi niente spostarli de qualche giorno. 'sto Ano lo guarnisso, no con oroscopi, ma solo con la dolceza dei fiori, dei fruti e dela gioia che me da le vacanze.

---

No semo poligloti

La storia de'sto posto
ga cambià i confini
e ga pagà alto costo
i sui zitadini.

Nei secoli, el Tedesco
dovevimo imparar,
ma i noni, intorno al desco
nei veci casolar,

tigniva sempre viva,
sperando nel doman,
la lor lingua nativa
che iera l'Italian!

Ala lor Patria unidi
ben poco i gà durà.
Semo restadi privi
de la nostra unità.

E quante altre parlade,
xe meio de no dir,
se gavessi imparade
prima de se riunir,

se no ghe fossi stade
gran animosità
de 'ste genti tacade
all'italianità.

La Giulia, nostro vanto,
smembrada i ne la ga.
L'Istria, nostro rimpianto,
i ne la ga negà.

Ma no ghe xe 'na ragion,
pur questa xe realtà
de negarne la region,
per fin l'identità.

Un'altra lingua ancora
i ne daria doman:
per l'Italia xe l'ora
che parlemo Furlan!

El Furlan xe una lingua,
i l'insegna a scola
e i vol che i se distingua
per cepo e parola.

Forsi per poco sfogo,
ma se zà sensazion,
che 'l ruol de capoluogo
fazi un gran tombolon.

Noi, nelo stivaleto,
semo sol un budel.
'sto suolo benedeto
xe diventà sol quel.

Noi che in Italia semo
solo i giovin fanciul
sentirse di dovemo
"Trieste xe in Friul."

(1996)

---

Sport estremo

L'astronave partirà per el spazio.
La sarà piena de grandi sportivi
che anderà in zerca de nove aventure.

Per lori, star quazò xe vero strazio,
perchè de adrenalina i xe ormai privi:
per aver emozion no ghe xe cure.

"Co' saremo lassù, cossa faremo?"
I se domanda un poco dubiosi.
La logica risposta xe una sola:

"Quel che gavemo fato: sport estremo!
Noi verzeremo, per mati grintosi,
nela palestra del zel, una scola."

I rampigherà sul monte de Marte:
del Everest el xe tre volte alto.
Con man e piedi, bianchi, infarinadi

senza corde, come la nova arte,
per arivar in zima con un salto,
eleganti, dale roce stacadi.

Per la distanza che xe calcolada
i corerà più de un ragio de luce,
nela gran pista dela Latea Via,

dove auto, nè moto xe arivada.
Cambierà gome el zemel Polùce.
Càstore, ala partenza, darà el via.

Come rede i segneti zodiacali
dividerà el campo dei gran tenisti
che imbrazerà, come vere rachete,

per esser unici e sempre speciali,
come nel tempo nissun li ga visti,
le code luminose de comete.

Assai lontan svolerà i meteoriti,
da robusti atacanti calciadi,
che segnerà, per la squadra, tanti gol

soto i oci dei tifosi acaniti
che mai simili ga visti o sognadi,
perchè i riverà fin al centro del Sol.

Se buterà zò dal secio de Acquario
canoe, gomoni o forsi anche nudando,
muli forti più bei che un dinosauro.

Saltadi sul dorso del Sagitario
i traverserà l'Etra cavalcando
e i sfiderà a una gara Alfa-Centauro.

Da pianeti che neve mai ga vista,
tra valanghe de polvere cosmica,
se buterà con pericolo e vanto

quei che xe fra i più grandi "forapista"
e i salterà, come in una comica,
dentro al'antimateria per incanto.

Nel pelago del zielo, solitari
navigatori, al fin de l'universo
ariverà, galassie traversando.

Del "big bang" conterà i particolari
pianzendo qualchedun che sarà perso
nel'oceano imenso, naufragando.

Questi sarà custodi dei segreti
del sconfinato, infinito mistero!
Per praticar sport estremo astrale,

purtropo qualchedun dei meio atleti
scomparirà in un gran buso nero,
per vinzer la "medaia universale"!

(2000)

---

Visualizza ingrandimento copertina libro (dipinto di Helga Lumbar Robba)

Nidia Robba - Romanzi, raccolte di poesie, notizie

Prima del nuovo numero di Kritik

Lista libri recensiti

Home page